Sholeh & Akrom; Ngangsu Banyu Kahuripan Ing Pesantren

“Rebo Wekasan”

(Sholeh Akrom Kaping 34)

oleh: Sahal Japara

Sholeh: “Iki sasi opo Krom?”

Akrom: “Shofar Leh. Piye?”

Sholeh: “Shofar? Lho, iki malem Rebo ya?”

Akrom: “Iyo, ono opo to Leh?”

Sholeh: “Lho, iki dak Rebo wekasan wong Rebo pendake wis sasi Maulud.”

Akrom: “Nek Rebo wekasan trus gene to Leh?”

Sholeh: “Mosok awakmu lali? Kae pas ning kelas awak dewe didundumi lempiran Kyai Mu’adz Thohir saking Simbah Kyai Sahal, isine yo tentang Rebo wekasan iki.[1]”

Akrom: “Laiya isine opo tooo? Aku kae turu watake.”

Sholeh: “Ngene Krom, ngendikane poro ulama seng ahli mukasyafah ono ing Rebo wekasan utowo Rebo terakhir kang ono ing wulan Shofar, iki bala’ seng akehe 320.000 balak turun ing dino iku. Kerono ikulah, awak dewe diutus Romo Kyai Sahal saperlu ngelakoni shalat tolak balak.”

Akrom: “Sholat tolak balak?”

Sholeh: “Iyo krom!”

Akrom: “Piye iku carane?”

Sholeh: “Sholat 4 rekaat diniati daf’ul balak, saben rong rekaat salam sepisan. Saben rekaat kudu maos al-fatichah x1, al-kautsar x17, al-ikhlash x5, al-mu’awwidzatain x1. Lah sak bakdane shalat banjur ndungo:

بسم الله الرحمن الرحيم. اللَّهُمَّ يَا شَدِيْدَ الْقُوَى وَيَا شَدِيْدَ المِحَالِ، يَا عَزِيْزُ يَا مَنْ ذَلَّتْ لِعِزَّتِكَ جَمِيْعُ خَلْقِكَ، إِكْفِنِيْ مِنْ شَرِّ جَمِيْعِ خَلْقِكَ يَا مُحْسِنُ يَا مُجْمِلُ يَا مُتَفَضِّلُ يَا مُنْعِمُ يَا مُتَكَرِّمُ، يَا مَنْ لَا إِلَهَ إِلَّا أَنْتَ إِرْحَمْنِيْ بِرَحْمَتِكَ يَا أَرْحَمَ الرَّاحِمِيْنَ. اللَّهُمَّ بِسِرِّ الْحَسَنِ وَأَخِيْهِ وَجَدِّهِ وَأَبِيْهِ وَأُمِّهِ وَبَنِيْهِ إِكْفِنِيْ شَرَّ هَذَا الْيَوْمِ وَمَا يَنْزِلُ فِيْهِ يَا كَافِيَ الْمُهِمَّاتِ يَا دَافِعَ الْبَلِيَّاتِ، فَسَيَكْفِيْكَهُمُ اللهُ وَهُوَ السَّمِيْعُ الْعَلِيْمُ، وَحَسْبُنَا اللهُ وَنِعْمَ الْوَكِيْلُ، وَلَا حَوْلَ وَلَا قُوَّةَ إِلَّا بِاللهِ الْعَلِيِّ الْعَظِيْمِ. وَصَلَّى اللهُ عَلَى سَيِّدِنَا مُحَمَّدٍ وَعَلَى أَلِهِ وَصَحْبِهِ وَسَلَّمَ. وَالْحَمْدُ لِلهِ رَبِّ الْعَالَمِيْنَ.

"Bismillahirrahmanirrahim. Ya Allah, duh Dzat Kang Maha Kuat duh Dzat Kang Maha Daya, duh Dzat Kang Agung, duh Dzat kang kabeh makhluk tunduk dumateng keagungan Panjenengan, mugi panjenengan selametke kula saking ala-alane sedanten makhluk Panjenengan. Duh Dzat Kang Mbagusi, duh Dzat Kang Ngapiki, duh Dzat Kang Maha Utama, duh Dzat Kang Paring Nikmat, duh Dzat Kang Maha Mulya, duh Dzat kang mboten wonten pengeran kang haq disembah kejawi Panjenengan, mugi Panjenengan welasi kula kelawan rahmatipun Panjenengan duh Dzat Kang Maha Welas-welase wong kang padha welas. Ya Allah, kelawan sirr-ipun Sayyidina Hasan, Sayyidina Husain, Sayyidina Muhammad, Sayyidina Ali, ugi Sayyidah Fathimah, mugi Panjenengan selametaken kula saking kealanan-kealanan dinten niki ugi sedanten kealanan kang turun wonten dinten niki, duh Dzat Kang Maha Nyukupi Kekarepan, duh Dzat Kang Maha Nulak bebayan. Mangka Gusti Allah bakal nyelametke ing sira, sakmangka Gusti Allah iku Dzat Kang Maha Midanget uga Maha Ngudaneni. Lan kacukupan ingsun iku naming Gusti Allah thok, lan Gusti Allah iku sak bagus-baguse Dzat kang dipasrahi. Ora ana daya lan upaya kejaba iku kagungane Gusti Allah Kang Maha Luhur uga Maha Agung. Shalawat salam tansah kinunjuk dumateng Kanjeng Nabi Muhammad. Walhamdu lillahi robbil 'alamin."

Akrom: “Wektune kapan iku Leh?”

Sholeh: “Wektune nek seng tinulis sak jeroning lampiran iku bakda shalat Maghrib.”

Akrom: “Lha trus kepiye iki sak mongko awak dewe wes klewat wektune?”

Sholeh: “Yo tetep dilakoni to Krom sam’an wa tho’atan kaleh Romo Kyai. Iki kan yo iseh Rebo to?”

Akrom: “Iyo Leh. Eh, tapi aku kok tau kelingan pangendikane Syekh Abdul Qadir Jaelani intine ngene, awak dewe dipenging nyepetke nikmat ugo dipenging nolak balak. Tapi coro arabe aku lali.”

Sholeh: “eeee iku Krom… Iki to maksudmu?

لَا تَخْتَرْ جَلْبَ النَّعْمَاءِ وَلَا دَفْعَ الْبَلْوَى فَإِنَّ النَّعْمَاءَ وَاصِلَةٌ إِلَيْكَ بِالْقِسْمَةِ اسْتَجْلَبْتَهَا أَمْ لَا، وَالْبَلْوَى حَالَّةٌ بِكَ فَإِنْ كَرِهْتَهَا فَسَلَّمْ لِلهِ فِي الْكُلِّ يَفْعَلُ مَا يَشَاءُ[2]

Ojo milih narik nikmat ugo nolak balak, kerono saktemene nikmat iku tumeko maring siro kelawan bagian kang kang wus ditetepke cik kepengen mbok cepetke utowo ora, sedeng balak iku pancen wis manggon nemplek sliramu. Lamun gething siro, mongko pasrahke wae kabeh dumateng Gusti Allah supoyo Gusti Allah nindaki opo kang dikersakke.

Akrom: “Iyo Leh, bener iku. Iku dak Syekh Abdul Qadir ngendiko yen awak dewe gak pareng nolak balak to kerono balak iku wes pancen manggon netep lan nemplek awak dewe? Opo sholat tolak balak iku ora bertentangan karo ngendikane beliau iku?”

Sholeh: “Hehe nek sekilas disawang pancen bertentangan si Krom. Tapi mbok yoho awakmu nek moco iku diteruske ben pemahamanmu utoh, ora kapegot-pegot! Pancen bener awak dewe dipenging Syekh Abdul Qadir saking nolak balak kerono balak iki wes pancen manggon netep lan nemplek awak dewe, nanging lamun awak dewe ora seneng ketekan balak kan diutus beliau masrahake sedanten dumateng Gusti Allah badhe ngersakke nopo mawon sumonggo, فسلّم لله في الكلّ يفعل ما يشاء. Iki lho maksudku Krom. Anggenmu moco dipolke. Carane awak dewe masrahke kabeh dumateng Gusti kan yo karo shalat daf’ul balak iki.”

Akrom: “Lha tapi iku kan podho wae nolak balak to Leh?”

Sholeh: “Hehe iyo Krom. Aku paham karepmu. Pancen bener shalat iki tujuane daf’ul balak, ananging sejatine shalat iki namung wasilah lan perantara supoyo menungso iki iso masrahke sedanten dumateng Gusti, سلّم لله في الكلّ. Shalat ikilah seng biso njembatani antarane larangan nolak balak kerono balak wes pancen nemplek menungso lan perintah masrahke sedoyo ukoro dumateng Gusti. Dadi koyo-koyo Syekh Abdul Qadir ki ngendikan ngeten: mbok enggo opo leh kuwe nolak balak barang, wong menungso kawit lahir iku yo ora bakal biso semugih songko balak? Yo wes ah, nek awakmu gak kuat lan gak seneng ketekan balak, yo pasrahke wae kabih-kabihe maring Gusti Allah. Dadi intine latihan pasrah Krom!”

Akrom: “Eeee ngono to Leh? Lha tapi jarene haditse dho’if Leh? Dho’if dak ora keno dienggo hujjah utowo landasan hukum a?”

Sholeh: “Hehe wes bola-bali awak dewe ki diterangke guru-guru, awakmu nek endi wae to Krom? Puancen bener nek hadits dho’if iki ora keno kanggo dasar hukum, tapi lamun dienggo anjuran lan peringatan (ترغيب - ترهيب) dak yo gak popo to?”

Akrom: “Eh iyo Leh. Lagi kelingan aku. Opomaneh iki diutus Kyai dak yo wes dipertimbangke lan ono landasane yo.”

Sholeh: “Lhaah.. ngerti ngono kok.. wes ayo ditandangi.”

Akrom: “Siaappp komandan!!!”

---

[1] Ijazah shalat Rebo Wekasan punika dipun edaraken KH Ahmad Mu’adz Thohir wekdal penulis Kelas 3 Aliyah B Tahun 2007.

[2] Sayyid Ja’far al-Barzanji, Manaqib Syeikh ‘Abdul Qadir al-Jailani.