Sholeh & Akrom; Ngangsu Banyu Kahuripan Ing Pesantren

“Rekodoyo”
(Sholeh & Akrom Kaping 24)

oleh: Sahal Japara

Akrom: “Aku lho gruegeten nek ngerti polahe Amerika Leh, senengane gawe-gawe geger ndunyo wae. Kawit Afghanistan, Irak, Libya, Mesir, seng terakhir Syria kok amen dirusohi wae.[1] Alasane aneh-aneh, ah teroris, ah nyimpen senjata pemusnah masal, ah senjata kimia. Gayane sok-sok dadi pahlawan, muna-muni nulung jebul malah menthung.”

Sholeh: “Iku jenenge كَيْدٌ Krom, rekodoyo utowo konspirasi. Rekodoyo iku ngreko usaha kanthi tujuan tertentu seng biyasane olo. Tapi seng ngrekodoyo biasane ciloko, kaya dawuhe Gusti Allah:

أَلَمْ يَجْعَلْ كَيْدَهُمْ فِي تَضْلِيْلٍ؟[2]

Kang artine: "Apata Pengeranmu ora ndadeake rekadayane wong-wong kafir ing ndalem kesasaran?"

Contone: Rojo Abrohah nyerang ka’bah, munine kerono bales dendam ono bolone seng dipateni, tapi sejatine tujuane ora iku Krom!”

Akrom: “Lha opo tujuane Leh?”

Sholeh: “Nguasani jazirah Arab! Supoyo wong-wong podho madep Ka’bah-e Abrohah seng nek Yaman, seng dadi pusate Krom![3] Nek tak delok-delok, polahe Amerika kok koyo Rojo Abrohah, Pasukane podho akehe podho gedene koyo Gajah, podho kepengen nguasani jazirah Arab! Jajal deloken Krom, letake Afgahnistan, Irak, Libya, Mesir, trus Iran karo Israel iku meh sejajar mbentuk garis vertikal, iki mesti ono maksude!. Tur nek ndelok bentuke, negoro-negoro seng diinvasi Amerika iku letake koyo-koyo ngepung Iran Krom!”

Akrom: “Iyo yo Leh, Iran dikepung ko tengen Afghanistan, ko kiwo Irak karo Syria, ditambah ko ngisor Arab Saudi karo Qatar seng dadi bolone Amerika ndaak!. Koyo perang Khondaq wae Kanjeng Nabi nek Madinah dikepung ko berbagai arah, tapi berkat ide-ne Sayyidina Salman seng usul ken ndamel parit akhire pasukane Kanjeng Nabi menang.[4]”

Sholeh: “Sek sek Krom, Sayyidina Salman asline saking Iran, lha Iran sakiki dikepung Amerika sak balane. Iki mesti ono maksude Krom!.”

Akrom: “Maksude opo Leh.”

Sholeh: “Iso-iso iki ape ono perang seng ngluwehi perang khandaq zaman Kanjeng Nabi Krom! Seng nduwe rudal wes podo ngelus rudale dewe-dewe. Kerusuhan nek endi-endi ora karu-karuan. Nek wes ngene, biasane do bolo-bolonan, koyok pas awak ndewe dolanan wayah cilik kae lho do bolo-bolonan.”

Akrom: “Kiro-kiro endi musuh endi Leh?”

Sholeh: “Iran cs. VS Israel & Amerika cs. Syria iku dibekingi Iran, sementara letake iku jejeran karo Israel. Nek pancen Syria sido diserang Amerika, Wah rame tenan iki Krom! Seumpomo Iran dikepung Amerika & Israel cs., aku kok yakin nek kemenangan Muslimin pas perang khandaq bakal teko maneh! Kerono Sayyidina Salman berdarah Iran Krom!”

Akrom: “Ohh ngono yo leh. Lhaia tekan Indonesia yo melu-melu tuku rudal, kapal, tank perang kok. Mosok iki ape perang tenan ya Leh? Nek perang terus awak ndewe piye?”

Sholeh: “Hehe Indonesia iku latihan numpaki pesawat perang wae wes tibo dewe kok ape melu-melu perang? Awak ndewe yo ngopi wae karo ndelok tivi ngono wae ah. Tapi sebagai ksatria jawa hehe gayane, awak ndewe tetep ndekek keris pusoko nek mburi geger tondo waspodo Krom. Ketoke nganggone jarik gayane kalem, tapi sekali musuh nyedak, langsung ganyang Krom!”

Akrom: “Yo wes mugo-mugo awak ndewe ora menangi perang yo Leh. Dienak-enake, perang tetep gak enak!”

Sholeh: “Iyo Krom. Perang iku geteh, geteh iku najis!”

---

[1] Kedadiyan punika Tahun 2013.

[2] QS al-Fil: ayat 2.

[3] Quraisy Syihab, Sirah Nabawiyyah.

[4] Ibid.